सर्लाहीको बरहथवा नगरपालिका वडा नम्बर १४ र १५ मा पर्ने हरपुर्वा गाउँ नगरपालिकाकै विकट गाउँको रुपमा चिनिन्छ । जहाँका दुई चेलीले सिङ्गो गाउँकै नाम रोशन गरेका छन् ।

 

माथिको फोटोमा देखिएकी यी दुई चेली बरहथवा नगरपालिका-१५ हरपुर्वाका बजरंग यादवकि सुपुत्री ममता कुमारी यादव र सोही गाउँका महन्त यादवकि सुपुत्री अञ्जली कुमारी यादव हुन् । ममता गाउँकै सामुदायिक बिधालयमा कक्षा १० मा पढ्छिन् भने अञ्जली वडा नं.१० मा पर्ने महेन्द्र रत्न जगरनाथ लक्षमिनिया उच्च मावि सितापुरमा कक्षा १० मा नै पढ्छिन् । ममता आफ्नो कक्षामा प्रथम छिन् भने अञ्जली दोस्रो छिन् ।

 

बुधबार बरहथवा नगरपालिका शिक्षा शाखाले राष्ट्रिय शिक्षा दिवसको अवसरमा आयोजना गरेको नगरपालिका स्तरीय वक्तित्वकला प्रतियोगितामा नाम चलेका ठुलठुला विद्यालयलाई पछी पार्दै ममता प्रथम भइन् भने अञ्जली तृतीय । ममताले आफ्नो गाउँकै सामुदायिक बिधालयबाट प्रतिनिधित्व गरेकी थिइन् भने अञ्जली आफू अध्यनरत सितापुर बिधालयबाट ।

 

शिक्षा शाखा प्रमुख अनिल साहले अभिभावकहरुको अन्तर्निहित क्षमतालाई प्रस्फुटन गराउने, अभिव्यक्तिगत क्षमतालाई बढाउन दिन, नानी बाबुमा आफूभित्र रहेको आत्मविश्वासलाई बढाउन दिन तथा कुनै पनि विषयमा दिएको सीमित समय-अवधिमा केन्द्रित भई बोल्न सक्ने बनाउने लगायतका उद्देश्यका साथ प्रतियोगिता गरिएको बताए।

 

उनका अनुसार प्रतियोगितामा नगरपालिका भित्रका १६ वटा बिधालयका (एकजना छात्र र एकजना छात्रा) दुईदुइ जना गरि ३२ जना बिद्यार्थी भाग लिएका थिए । प्रतियोगितामा दोस्रो स्थान भने मुनलाइट सेकेन्डरी स्कुलका आदित्य कुमार महतोले प्राप्त गरेका थिए ।

 

प्रथम, द्वितीय, तृतीय र चौथो स्थान हासिल गरेका बिद्यार्थीहरुलाई बिहिवार (आज) नगरपालिकाकि नगर प्रमुख कल्पना कुमारी कटुवालले पुरस्कार र प्रमाणपत्र प्रदान गरेकी छन् । पुरस्कार वितरण कार्यक्रमलाई सम्बोधन गर्दै कटुवालले विकट वडाको बिधालयका बिद्यार्थीको प्रस्तुतिले शिक्षा क्षेत्रको अवस्था सुधारजनक रहेको बताइन् ।