जेन्जी आन्दोलनका क्रममा रौतहटको कारागारबाट फरार भएका एक कैदीलाई सर्लाही प्रहरीले नियन्त्रणमा लिएको छ। इलाका प्रहरी कार्यालय केशरगंजका अनुसार सोमबार दिउँसो करिब १ बजे जबरजस्ती करणी मुद्दामा १२ वर्ष कैद सजाय तोकिएका कैदी दिपेश साह सोनार उर्फ शेरु साहलाई पक्राउ गरिएको हो।

 

रौतहट जिल्लाको दुर्गाभगवती गाउँपालिका–५, वडहर्वा टोल निवासी २९ वर्षीय सोनार जिल्ला कारागार कार्यालय रौतहटमा कैद भुक्तान गरिरहेका थिए। उनले हालसम्म ३ वर्ष ९ महिना सजाय भुक्तान गरिसकेका थिए। उनी जेन्जी आन्दोलनका क्रममा भदौ २४ गते कारागारबाट फरार भएका थिए।

 

फरार भएपछि लामो समयदेखि लुकीछिपी बस्दै आएका उनलाई सर्लाहीको ईश्वरपुर नगरपालिका–६, बयलबास क्षेत्रबाट पक्राउ गरिएको प्रहरीले जनाएको छ। प्रहरी निरीक्षक नितेश कुमार सिंहको कमाण्डमा खटिएको टोलीले उनलाई इलाका प्रहरी कार्यालय केशरगंजबाट करिब १ किलोमिटर दक्षिण–पश्चिम क्षेत्रमा लुकेर बसेको अवस्थामा नियन्त्रणमा लिएको हो।

 

पक्राउ परेका सोनारलाई आवश्यक कारबाहीका लागि पुनः जिल्ला कारागार कार्यालय रौतहट पठाउने प्रक्रिया अघि बढाइएको जिल्ला प्रहरी कार्यालय सर्लाहीका प्रवक्ता एवम् डिएसपी सरोज राइले बताए ।