नेपाली कांग्रेस सर्लाही जिल्ला कार्य समितिले चक्कु प्रहार घटनामा राजनीतिक दबाबका आधारमा मुद्दा अगाडि बढाइएको भन्दै गम्भीर आपत्ति जनाएको छ। जिल्ला कार्य समितिले विज्ञप्ति जारी गर्दै घटनाको निष्पक्ष छानबिन गरी वास्तविक दोषीलाई कारबाही गर्न सरकारसँग माग गरेको हो।

 

विज्ञप्तिमा उल्लेख भएअनुसार करिब एक वर्षअघि भएको घटनालाई लिएर हालै निर्वाचित जनप्रतिनिधिको दबाबमा परेर प्रहरी प्रशासनले अनुसन्धान प्रक्रिया अघि बढाएको आरोप लगाइएको छ। घटनासम्बन्धी यथार्थ अनुसन्धान नगरी पूर्वाग्रही ढंगले कागजात तयार गरी निर्दोष व्यक्तिलाई फसाउन खोजिएको दाबी गरिएको छ।

 

नेपाली कांग्रेस सर्लाहीले उक्त घटनालाई “निन्दनीय” भन्दै सत्य तथ्य छानबिनका लागि उच्चस्तरीय न्यायिक समिति गठन गर्न माग गरेको छ। साथै दोषी पहिचान गरी कानूनी दायरामा ल्याउन र निर्दोषलाई न्याय दिन सरकारसमक्ष जोडदार आग्रह गरिएको छ। यदि यथाशीघ्र निष्पक्ष छानबिन समिति गठन नभए चरणबद्ध आन्दोलनमा उत्रने चेतावनीसमेत दिइएको छ।