विद्युत प्राधिकरण बरहथवा वितरण केन्द्रले अग्रिम सूचना बिना बरहथवा नगरपालिका अन्तर्गतको कृषि विकास शाखाको मिटर खोलेर लगेको कार्यालय प्रमुख अरुण सिंहले आरोप लगाएका छन् । आइतबार (आज) साझ सेवाग्राहीको काम गरिरहेकै बेला प्राधिकरणका सब इन्जिनियर ललित सिंहले दादागिरी शैलीमा मिटर खोलेर लगेको शाखा प्रमुख सिंहको आरोप छ ।

 

प्राधिकरणका कर्मचारी आएर मिटरको स्पीड कम भएका कारण मिटरमा खपत कम आउने गरेको भन्दै सेवाग्राहीको काम प्रभाव हुनेगरी मिटर खोल्न लागेपछि आफुले नखोल्न अनुरोध गरेपनि नमानेको शाखा प्रमुख सिंहले बताए । त्यस्तै, सेवा लिना कार्यालय पुगेका बरहथवा-२, हजरियाका सेवाग्राही चैनकिशोर दासले आफ्नो काम भइसकेपछी खोल्नु भनेर अनुरोध गर्दासमेत प्राधिकरणका कर्मचारीहरु नमानेको बताए ।

 

शाखा प्रमुख सिंहका अनुसार आफ्नो शाखा कार्यालयमा ४ वटा बत्ती, ४ वटा पंखा र २ सेट कम्प्युटर प्रिन्टर सेट मात्र रहेकोमा अहिले जाडो महिना भएकोले पंखाको प्रयोग नहुदा खपत कम हुनेगरेको छ । उनले भने, `एउटा ५ वाडको बत्ती र कम्प्युटर चलेबापत पछिल्लो महिनाको बिल १ सय ७२ रुपैयाँको आएको छ, अनि कसरी खपत कम भयो´। प्राधिकरणका कर्मचारीले पुर्वाग्रह राखी मिटर खोलेर लगेको उनको आरोप छ ।

 

यता, विद्युत प्राधिकरण बरहथवा वितरण केन्द्रका प्रमुख अन्जनी यादवले उक्त मिटरमा खपत कम आउने गरेकोले मिटर बदलिनका लागि खोलेर ल्याइएको दाबी गरे । अर्को मिटर आजै कृषि विकास शाखामा जडान गरिने उनले बताए ।

 

बरहथवा नगरपालिकाको कृषि विकास शाखा नगरपालिकाको प्रशासनिक भवनसंगै नरहेर हिरापुर जाने हुलाकी सडकको पश्चिमपट्टी प्रभु बैंकको अगाडी रहेको छ ।